Ukeuë Bansa Atjèh Njang Teupeumulia,
Assalamu’alaikum Warahmatullahi Wabarakatuh.
Nibak uroë njoë, uroë buleuën 23 buleuën April thôn 2013, kamoë dari Acheh-Sumatra National Liberation Front / Atjèh Meurdéhka (ASNLF/AM) Malaja, meupeutrôh suka tjita nyang that lambông keu mandum rakjat Atjèh njang teungoh geupeu-ingat Uroë Pahlawan Nasional Atjèh njang keu-140.
Do’a geutanjoë keu mandum pahlawan njang ka sjahid nibak geupeutheun dèëlat Atjèh dari seurangan musôh, beuNeuteurimong mandum ‘amalan mandum droëneuh njan dan beuNeubri keuh teumpat sjiruga manjang.
140 thôn njang ka u likôt, keuradjeuën Beulanda ka djipeunjata prang ateuh bangsa geutanjoë Atjèh njang that beuhe, tjeudaih, dan meusjuhu. Meuplôh-plôh ribèë njawong sjuhada geutanjoë ka gadoh nibak geupeutheun droë dan bansa geuh nibak buët peundjadjah njang ka djipeuphôn lé Beulanda njoë. Meunan keuh 140 thôn njang ka u likôt, deungon jum njawong sjuhada, ka keumah geutjôk saboh keumeunangan lam mideun prang Bandar Atjèh njang tapeu-ingat sibagoë uroë Pahlawan Nasional Atjèh nibak uroë njoë.
Meunan keuh taharap, deungon takeunang keulai keumeunangan éndatu teuh ateuh angkatan prang keuradjeuën Beulanda njan, beudjeuët geutanjoë tapeubeudoh keulai seumangat lam dada teuh bahwa geutanjoë nakeuh bansa peudjuang. Geutanjoë han akan tasurôt lé nibak tapeutheun dèëlat Atjèh Meurdéhka. Peurdjuangan njoë akan teutap tasambông lagèë ureuëng chik teuh geusambông buët ureuëng chik geuh dan ureuëng njan geusambông buët ureuëng sigohlom njan lom. Buët njoë Insja Allah han akan gadoh sampoë geutanjoë tateumeuëng lét dumna peundjadjah dari bumoë Atjèh dan tateumeuëng rhah tanôh Atjèh njoë nibak buët keudji djih njang ka djipeu-antjô udèp rakjat dan bansa geutanjoë.
Buët njoë Insja Allah akan sabé tapeudjak deungon seumangat njang ka geukubah lé éndatu teuh:
Hadjat lôn aneuk,
Beutadong beukong,
Beulagèë teuglong,
Lagèë teupula.
Saleuëm Atjèh Meurdéhka!!!
ASNLF Malaja
No comments:
Post a Comment